ქვემო ქართლში სახელმწიფო რწმუნებული გიორგი დოხტურიშვილი, მუნიციპალიტეტების ხელმძღვანელ პირებთან ერთად, სამხარეო ადმინისტრაციაში, ღვინის ეროვნული სააგენტოს მიერ წარმოდგენილ პრეზენტაციას გაეცნო. 

სააგენტო, ქვემო ქართლში, შიდა ქართლში, მცხეთა-მთიანეთსა და სამცხე-ჯავახეთში ვენახების კადასტრის პროგრამის განხორციელებას იწყებს. პროგრამის დეტალები და მნიშვნელობა ღვინის ეროვნული სააგენტოს თავმჯდომარის მოადგილე ზურაბ ვაჭარაძემ და მევენახეობის კადასტრის სამმართველოს უფროსმა დავით მაღრაძემ პრეზენტაციის ფორმატში განიხილეს. 

როგორც შეხვედრის მიმდინარეობისას აღინიშნა, ვენახების კადასტრის პროგრამის განხორციელება დარგის განვითარებას შეუწყობს ხელს -  კადასტრის შექმნა კი რთველის პროცესის გამარტივებასა და ყურძნისეული პროდუქტების ხარისხს უზრუნველყოფს. 

შეხვედრაზე, ადგილობრივი ხელისუფლების წარმომადგენლების მხრიდან, პროგრამის განხორციელების პროცესში, კომპეტენციის ფარგლებში, ჩართვის სრული მზადყოფნა გამოითქვა.

აღსანიშნავია, რომ ვენახების კადასტრის პროგრამას ღვინის ეროვნული სააგენტო 2014 წლიდან ახორციელებს. გასულ წელს, პროგრამის ეტაპი კახეთისა და რაჭა-ლეჩხუმის  რეგიონებში დასრულდა.