ქალაქ ბოლნისში, ოფიციალური ვიზიტით ჩინეთის რესპუბლიკის ეთნიკურ საკითხთა ეროვნული კომისიის (NEAC) დელეგაცია იმყოფებოდა.

ვიზიტის მიზანს ქვემო ქართლის რეგიონში მცხოვრები ეთნიკური უმცირესობების მიმართ არსებული ვითარების ადგილზე გაცნობა და შემდგომი თანამშრომლობის ჩამოყალიბების საკითხების განხილვა წარმოადგენდა.

შეხვედრას ქვემო ქართლში სახელმწიფო რწმუნებული გიორგი დოხტურიშვილი, შერიგებისა და სამოქალაქო თანასწორობის საკითხებში სახელმწიფო მინისტრის პირველი მოადგილე ლია გიგაური, ბოლნისის მუნიციპალიტეტის მერი დავით შერაზადიშვილი და მარნეულის მუნიციპალიტეტის მერი კენან ომაროვი ესწრებოდნენ.

შერიგებისა და სამოქალაქო თანასწორობის საკითხებში სახელმწიფო მინისტრის აპარატის ორგანიზებით გამართული ვიზიტის ფარგლებში დელეგაციის წევრებმა ქალაქ ბოლნისის N1 საჯარო სკოლა მოინახულეს, ბოლნისის მუზეუმი დაათვალიერეს, ქართულ-გერმანული ღვინის სახლში ბოლნისელი მეღვინეების მიერ წარმოებული ღვინო დააგემოვნეს და ქვემო ბოლნისში მცხოვრები აზერბაიჯანული ხალიჩების მქსოველის ნამუშევრებს გაეცნენ.

ბოლნისის მუნიციპალიტეტში გამართულ შეხვედრას ქვემო ქართლში სახელმწიფო რწმუნებულის მოადგილე, კახა კობერიძე, ბოლნისის მუნიციპალიტეტის მერის მოადგილე, ლონგინოზ გასანოვი და ბოლნისის მუნიციპალიტეტის საკრებულოს თავმჯდომარე, თამაზ ჟორჟოლიანი ესწრებოდნენ.