ქვემო ქართლში სახელმწიფო რწმუნებული, გიორგი დოხტურიშვილი ბოლნისის მუნიციპალიტეტში ევროკავშირის მიერ დაფინანსებული პროექტის ,,სამოქალაქო საზოგადოების გაძლიერება სოციალურ, ეკონომიკურ და პოლიტიკურ ცხოვრებაში თანაბარი და სრულყოფილი მონაწილეობისთვის“ პრეზენტაციას დაესწრო. 

პროექტი რეგიონის მასშტაბით სამ სამიზნე მუნიციპალიტეტში ბოლნისში, მარნეულსა და დმანისში განხორციელდება, რომელიც მიზნად, სხვა პრიორიტეტულ მიმართულებებთან ერთად, მოსახლეობის სოციალური და ეკონომიკური მდგომარეობის გაუმჯობესებას, საზოგადოებრივ და პოლიტიკურ ცხოვრებაში ადამიანების აქტიურ ჩართულობას, მედიის გაძლიერებას და ინკლუზიური მმართველობის სტილის დამკვიდრებას ისახავს.  

სახელმწიფო რწმუნებულმა, ორგანიზაციის წარმომადგენლებს მადლობა გადაუხადა რეგიონის მასშტაბით დაწყებული საქმიანობისთვის და სიტყვით გამოსვლისას ყურადღება სახელმწიფო და არასამთავრობო სექტორის ერთობლივი თანამშრომლობის აუცილებლობაზე გაამახვილა - საუბარი შეეხო, ბიუჯეტირების პროცესში მოქალაქეთა აქტიური მონაწილეობის, მეწარმეობის განვითარებისა და  მცირე და საშუალო ბიზნესის ხელშეწყობის საკითხებს. 

ღონისძიებას მუნიციპალიტეტების მერები და საკრებულოს თავმჯდომარეები, ასევე არასამთავრობო და მედია ორგანიზაციების წარმომადგენლები დაესწრნენ.