ქვემო ქართლში სახელმწიფო რწმუნებული, გიორგი დოხტურიშვილი, გარდაბნის მუნიციპალიტეტის სოფელი ახალი კუმისის მცხოვრებლების საჭიროებებს, დაპირებისამებრ, ადგილზე, პირადად გაეცნო და სოფელში საბაზისო ინფრასტრუქტურის მოწყობის მიზნით განსახორციელებელი გეგმები, ადგილობრივების ინტერესების მაქსიმალური გათვალისწინებით, სამხარეო ადმინისტრაციისა და მუნიციპალიტეტის ხელმძღვანელ პირებთან ერთად დასახა.

საუბარი, ძირითადად, საგზაო ინფრასტრუქტურის, წყალმომარაგებისა და ბუნებრივი აირით უზრუნველყოფის საკითხებს შეეხო, რაც მრავალი წელია, სოფლის მცხოვრებლებისთვის განსაკუთრებულ საჭიროებას წარმოადგენს.

შეხვედრის ფარგლებში, სახელმწიფო რწმუნებულმა, დიალოგის შედეგად გამოკვეთილი პრობლემების თანმიმდევრულად და ეფექტურად გადაჭრის აუცილებლობაზე გაამახვილა ყურადღება და აღნიშნა, რომ სამხარეო ადმინისტრაცია, მისი უშუალო ჩართულობითა და შესაბამის უწყებებთან აქტიური კომუნიკაციის გზით, სოფლის ინფრასტრუქტურული განვითარებისთვის ზრუნვას ინტენსიურ რეჟიმში უზრუნველყოფს.

მხარის პირველი პირის ინიციატივით, სოფელში, მასშტაბური საგზაო ინფრასტრუქტურული პროექტის განხორციელებამდე და მიწისქვეშა კომუნიკაციების მოწყობამდე, გარდაბნის მუნიციპალიტეტი, საავტომობილო გზას, უახლოეს დღეებში, დროებითი სარგებლობისთვის, მოაშანდაგებს. ასევე, დაიწყება ალტერნატიული წყაროების მოძიება მოსახლეობის წყალმომარაგებისთვის.

აღსანიშნავია, რომ გიორგი დოხტურიშვილი, ახალი კუმისის მცხოვრებლებს მათი პრობლემების ადგილზე გაცნობას, მიმდინარე კვირის ოთხშაბათს, მოქალაქეთა მიღების ფორმატში გამართულ შეხვედრაზე დაპირდა.