ქვემო ქართლში სახელმწიფო რწმუნებულმა, მედიასთან, ამ დროისთვის, მარნეულსა და ბოლნისში არსებული მდგომარეობა შეაფასა. შოთა რეხვიაშვილის განცხადებით, ადგილზე მობილური ჯგუფები ჩვეულ რეჟიმში აგრძელებენ მოსახლეობის თერმო-სკრინინგს. 17 ადამიანია იმყოფება საველე ჰოსპიტალში და უტარდებათ შესაბამისი სამედიცინო კვლევა. მედიკოსების დაკვირვების ქვეშაა, ასევე ერთი მოქალაქე, რომელსაც, მარნეულის საკარანტინე სივრცეში, მაღალი ტემპერატურა დაუფიქსირდა. ხელისუფლების მხრიდან დამატებით კიდევ გამკაცრდა პირობები რაც ითვალისწინებს საღამოს 21:00 საათიდან - დილის 06:00 საათამდე გადაადგილების შეზღუდვას. განთავსდება დამატებითი ბლოკ-პოსტები, რომლებიც გააკონტროლებენ ადამიანების მოძრაობას.
„ჩვენ უნდა შევჯერდეთ, რომ დავიცვათ ქცევის წესები, წინააღმდეგ შემთხვევაში ეპიდემიის შეჩერება შეუძლებელი გახდება. იქნება კიდევ უფრო მეტი შეზღუდვა და დისკომფორტი, ამიტომ უნდა მოვუფრთხილდეთ ერთმანეთს და ჩვენს სამშობლოს. როდესაც საგანგებო მდგომარეობაა და დადგენილია ქცევის სტანდარტი, ამ დროს არაფერია უფრო დიდი მიზანი, ვიდრე ჩვენი ხალხის ჯანმრთელობა და ქვეყნის სტაბილურობა,“- განაცხადა შოთა რეხვიაშვილმა.