15 ნოემბერს, კონრად ადენაუერის ფონდის საქართველოს ოფისის დირექტორი, ტომას შრაპელი, გერმანიის ფედერაციული რესპუბლიკის ელჩი, ჰუბერტ ქნირში, ქვემო ქართლში სახელმწიფო რწმუნებულის მოადგილე კახა კობერიძე, რუსთავის მერი ირაკლი ტაბაღუა და ადგილობრივი ხელისუფლების სხვა წარმომადგენლები ევროპული კლუბების მოსწავლეთა ნამუშევრებს გაეცნენ.

ღონისძიების ფარგლებში, რომელსაც რუსთავის #15 საჯარო სკოლამ უმასპინძლა, საპილოტე პროექტის მონაწილეებმა თემატური პრეზენტაციები წარადგინეს ევროპული ღირებულებების, იდეების, ადამიანის უფლებებისა და აქტიური მოქალაქეობის შესახებ. გაიმართა დისკუსია, სადაც მოსწავლეებმა ქვეყნებს შორის ურთიერთობებსა და ევროინტეგრაციის პროცესთან დაკავშირებით, მათთვის საინტერესო კითხვებზე პასუხი, უშუალოდ გერმანული მხარის წარმომადგენლებისგან მიიღეს.

წელს, საპილოტე პროექტში საქართველოს მასშტაბით 5 საჯარო სკოლა, მათ შორის რუსთავის #15 და #16 საგანმანათლებლო დაწესებულებები მონაწილეობდნენ. შედეგების გათვალისწინებით, მოხდება ქსელის შემდგომი განვითარება და მასში მონაწილე მოსწავლეთა რაოდენობის ზრდა.