ქვემო ქართლის გუბერნატორი, შოთა რეხვიაშვილი მუნიციპალიტეტების ხელმძღვანელ პირებთან ერთად, საქართველო-ლატვიის რეგიონების ეკონომიკურ ფორუმს დაესწრო.

ღონისძიება საქართველოს რეგიონული განვითარებისა და ინფრასტრუქტურის სამინისტროს, სავაჭრო-სამრეწველო პალატის, მცხეთა-მთიანეთის სამხარეო ადმინისტრაციის ორგანიზებითა და გაეროს განვითარების პროგრამის (UNDP) თანადაფინანსებით გაიმართა.

შეხვედრის ფარგლებში მხარეებმა ერთმანეთს, რეგიონების განვითარების შესახებ, საკუთარი გამოცდილება გაუზიარეს, ისაუბრეს საინვესტიციო პოტენციალზე და არსებული ინფრასტრუქტურის განვითარების მიმართულებით კონკრეტული წინადადებები განიხილეს. 

ღონისძიებას რეგიონული განვითარებისა და ინფრასტრუქტურის მინისტრის მოადგილე ილია ბეგიაშვილი, სავაჭრო-სამრეწველო პალატის პრეზიდენტი ნინო ჩიქოვანი, მცხეთა-მთიანეთის გუბერნატორი შალვა კერესელიძე, საქართველოსა და ლატვიის სამთავრობო და ბიზნეს-წრეების, ქვეყნის სხვადასხვა მუნიციპალიტეტების წარმომადგენლები ესწრებოდნენ. 

ეკონომიკური ფორუმის მიზანად ისახავს სავაჭრო-ეკონომიკური ურთიერთობების გაღრმავების ხელშეწყობას. აღსანიშნავია, რომ 2018 წლის იანვარ-აგვისტოს მონაცემებით, საქართველო-ლატვიას შორის სავაჭრო ბრუნვამ 28 მილიონ დოლარს გადააჭარბა, რაც წინა წლის ანალოგიურ პერიოდთან შედარებით 71 %-ით მეტია.