5 ივნისს, ბოლნისის მუნიციპალიტეტში სპორტისა და ახალგაზრდულ საქმეთა კომიტეტის ინიციატივით ,,ფიზიკური აღზრდისა და სპორტის შესახებ“ საქართველოს კანონის პროექტის საჯარო განხილვა გაიმართა. 

ღონისძიებაში მონაწილეობა მიიღეს საქართველოს პარლამენტის სპორტისა და ახალგაზრდულ საქმეთა კომიტეტის თავმჯდომარემ მიხეილ ყაველაშვილმა, საქართველოს კულტურისა და სპორტის მინისტრმა მიხეილ გიორგაძემ, ქვემო ქართლში სახელმწიფო რწმუნებულმა - გუბერნატორმა, გრიგოლ ნემსაძემ, ბოლნისის მერმა დავით შერაზადიშვილმა და რეგიონის მუნიციპალიტეტების წარმომადგენლებმა. 

საჯარო განხილვაზე ცენტრალური და ადგილობრივი ხელისუფლების წარმომადგენლებმა, თემით დაინტერესებულ პირებთან ერთად, იმსჯელეს კულტურისა და სპორტის სამინისტროს მიერ შემუშავებული „ფიზიკური აღზრდისა და სპორტის შესახებ“ კანონის პროექტზე. 

აღსანიშნავია, რომ კონსულტაციების შედეგად გამოთქმული მოსაზრებები წარედგინება კულტურისა და სპორტის სამინისტროს განსახილველად. ამ პროცესში გათვალისწინებულია საჯარო კონსულტაციების გამართვა ყველა დაინტერესებულ მხარესთან და მიზნობრივ ჯგუფთან - ცენტრალური და ადგილობრივი ხელისუფლების, სპორტული ორგანიზაციების, სამოქალაქო საზოგადოების, საერთაშორისო და დონორი ორგანიზაციების, კერძო სექტორის, მედიის წარმომადგენლებთან, დამოუკიდებელ ექსპერტებთან და სხვა დაინტერესებულ პირებთან.