გიორგი დოხტურიშვილი ამერიკის შეერთებული შტატების ჯორჯიის შტატის გუბერნატორს ბრაიან კემპს და პირველ ლედის, მარტი კემპს შეხვდა.

საქართველო და ჯორჯიის შტატი 1994 წლიდან თანამშრომლობენ. ამ ხნის განმავლობაში, საქართველოში, არაერთი ჰუმანიტარული დახმარების პროექტი და სამხედრო პროგრამა განხორციელდა.

ჯორჯიის შტატის გუბერნატორმა პირველ ლედისთან, მარტი კემპთან და დელეგაციის წევრებთან ერთად ოფიციალური ვიზიტის ფარგლებში, ქალაქ რუსთავში, ამერიკის შეერთებული შტატების საელჩოს თავდაცვის სფეროში თანამშრომლობის სამსახურსა და რუსთავის მერიას შორის გაფორმებული მემორანდუმის ფარგლებში აშენებული, აუტისტური სპექტრის მქონე ბავშვებისთვის სარეაბილიტაციო-განმავითარებელი ცენტრი „კესანე“ მოინახულა.

აღნიშნული ცენტრი აუტისტური სპექტრის მქონე ბავშვებს, საზოგადოებასთან ინტეგრაციის მიზნით, ეხმარება შემეცნებითი, თვითმოვლის, მოტორული, სოციალური და კომუნიკაციური უნარების განვითარებაში.

ქვემო ქართლში სახელმწიფო რწმუნებულთან ერთად, ჯორჯიის შტატის გუბერნატორს ქალაქ რუსთავის მერის პირველი მოადგილე, კახა გურული, მოადგილე ოთარ ტატალაშვილი, რუსთავისა და გარდაბნის ათი თემის მაჟორიტარი-დეპუტატი, ირაკლი შატაკიშვილი და საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილე, თამარ გაბუნია შეხვდნენ.