21-ე საუკუნის გმირისადმი მიძღვნილი საღამო.

გარდაბნის მუნიციპალიტეტში, ზურაბ ბეგიაშვილის ხსოვნისადმი მიძღვნილი საღამო გარდაბნის კულტურის ცენტრის ორგანიზებით გაიმართა.

თბილისის სახელმწიფო სამედიცინო უნივერსიტეტის დასრულების შემდეგ, ლეიტენანტი ბეგიაშვილი, საქართველოს შეიარაღებული ძალების IV ქვეითი ბრიგადის 42-ე ბატალიონში ექიმად მსახურობდა. 

საომარი მდგომარეობის პერიოდში საქართველოს თავდაცვის საქმეში გამოჩენილი დიდი დამსახურებებისათვის ,,სამშობლოსათვის თავდადებულის“ მედალი მიიღო. 

ზურა 28 წლის ასაკში, 2008 წელს, რუსეთ-საქართველოს ომში გმირულად დაიღუპა.

სამშობლოს დაცვისა და ერთიანობისათვის ბრძოლაში გამოჩენილი თავდადების, სიმამაცისა და თავგანწირვისათვის, ერისა და სამშობლოს წინაშე განსაკუთრებული დამსახურებისათვის ზურაბ ბეგიაშვილი, გარდაცვალების შემდეგ, ვახტანგ გორგასლის I ხარისხის ორდენით დაჯილდოვდა.

ზურაბ ბეგიაშვილი 21-ე საუკუნის გმირია. სულ მალე ზურას მშობლიურ მხარეში, კუმისში, მისი ხსოვნის პატივსაცემად და სახელის უკვდავსაყოფად, ერთ-ერთ ცენტრალურ ქუჩას, ზურას სახელი დაერქმევა. 

საღამოს ქვემო ქართლში სახელმწიფო რწმუნებულის მოადგილე, ნიკა კობახიძე, გარდაბნის მუნიციპალიტეტის მერი, დავით კარგარეთელი, რუსთავისა და გარდაბნის ათი თემის მაჟორიტარი დეპუტატი, ირაკლი შატაკიშვილი, კულტურის ცენტრის ხელმძღვანელი ლელა ბენდელიანი და ადგილობრივი ხელისუფლების წარმომადგენლები ესწრებოდნენ.