საქართველოს კულტურის, სპორტისა და ახალგაზრდობის სამინისტროს ინიციატივითა და მხარდაჭერით და ანზორ ერქომაიშვილის სახელობის ფოლკლორის სახელმწიფო ცენტრის ორგანიზებით, ქალაქ მარნეულში დიდი ქართველი პოეტის, შოთა რუსთაველის დღე აღინიშნა. 

ღონისძიებას საქართველოს კულტურის, სპორტისა და ახალგაზრდობის მინისტრის პირველი მოადგილე კახა სიხარულიძე, ქვემო ქართლში სახელმწიფო რწმუნებული, გიორგი დოხტურიშვილი, საქართველოს პარლამენტის მარნეულის მაჟორიტარი დეპუტატი ზაურ დარგალი, ქალაქ მარნეულის მუნიციპალიტეტის მერი კენან ომაროვი, მერის მოადგილე როინ დეკანოიძე და ადგილობრივი მოსახლეობა ესწრებოდა.

ჩატარდა ლექცია-სემინარი, სადაც ფილოლოგმა და პედაგოგმა მაკა ელბაქიძემ  ვეფხისტყაოსანზე შუასაუკუნეების აღმოსავლური ლიტერატურის კონტექსტში ისაუბრა, ფილოლოგმა ლევან გიგინეიშვილმა კი შოთა რუსთაველის ფენომენი განიხილა. 

ღონისძიების ფარგლებში საქართველოს კულტურის, სპორტისა და ახალგაზრდობის მინისტრის პირველმა მოადგილემ, მარნეულის მუნიციპალურ ბიბლიოთეკას კულტურის სამინისტროს მიერ გამოცემული 30-მდე დასახელების წიგნი გადასცა. 

მოწვეულმა სტუმრებმა მარნეულის კულტურის სახლის ფოიეში მსოფლიოს სხვადასხვა ენაზე გამოცემული ვეფხისტყაოსნის გამოფენა დაათვალიერეს, რის შემდეგაც მეთოჯინე არმენ ოვანესიანის თოჯინურ პერფორმანსს დაესწრნენ.

დასკვნით ნაწილში, მარნეულის კულტურის სახლის დარბაზში გაიმართა ანსამბლი „დიდგორი“-ს კონცერტი - ნაჩვენები იყო თემატური აუდიო-ვიზუალური კოლაჟები და ილუსტრაციები.