საქართველოს მთავრობის გადაწყვეტილებით, რუსთავში 107 ოჯახს მათ ფაქტობრივ მფლობელობაში არსებული საცხოვრებელი ფართები, სიმბოლურ ფასად, 1 ლარად  გადაეცა. 

ფართების  დაკანონების შესახებ ინფორმაცია, მოსახლეობას ქვემო ქართლში სახელმწიფო რწმუნებულმა გიორგი დოხტურიშვილმა და  რუსთავის მერმა ნინო ლაცაბიძემ,  ქალაქის საკრებულოს წევრებთან ერთად გააცნეს და მთავრობის განკარგულების ასლები პირადად გადასცეს.

საცხოვრებელი ბინები, რომელთა დაკანონებაც, ათწლეულების განმავლობაში არ ხერხდებოდა, რუსთავში, ბოლო ერთ წელიწადში,  უკვე 500-მდე ოჯახს გადაეცა საკუთრებაში. ამ ეტაპზე მერიის ქონების მართვის სამსახურში საჭირო პროცედურები კიდევ 150 განაცხადზე მიმდინარეობს. 

აღსანიშნავია, რომ ოჯახებს, რომელთა ფართის დაკანონების შესახებაც გადაწყვეტილება უკვე მიღებულია, ბინის კანონიერი მესაკუთრეობისთვის მხოლოდ საჯარო რეესტრის შესაბამისი რეგისტრაცია დასჭირდებათ.