საქართველოს კულტურის, სპორტისა და ახალგაზრდობის მინისტრი, თეა წულუკიანი, გიგა ლორთქიფანიძის სახელობის რუსთავის მუნიციპალური თეატრის წარმომადგენლებს შეხვდა და ადგილზე არსებული საჭიროებების შესახებ, რეგიონისა და მუნიციპალიტეტის ხელმძღვანელ პირებთან ერთად, იმსჯელა. 

სამუშაო შეხვედრას ქვემო ქართლში სახელმწიფო რწმუნებული გიორგი დოხტურიშვილი, რუსთავის მუნიციპალიტეტის მერი ნინო ლაცაბიძე და ვიცე-მერი კახა გურული დაესწრნენ - მხარეებმა რუსთავის თეატრის სამართლებრივი სტატუსის საკითხი და არსებული გამოწვევები დიალოგის რეჟიმში განიხილეს. 

საუბარი შეეხო რუსთავის მერის ინიციატივას, რომლის საფუძველზე, თეატრის მომავალი წლის ბიუჯეტი 300 000 ლარით გაიზარდა, რაც დიდწილად სახელფასო ფონდის ზრდას შეეხო. 

ვინაიდან რუსთავის თეატრის ერთ-ერთი უმთავრესი გამოწვევა შენობის რეაბილიტაციაა, მუნიციპალიტეტის მხრიდან მდგრადობის ექსპერტიზის ჩატარების შემთხვევაში, სამინისტრო რეკონსტრუქციისთვის საჭირო თანხების მოძიებას რუსთავის მერთან ერთად განახორციელებს. 
 
საუბარი შეეხო, ქალაქში, სახელოვნებო რეფორმის გატარების საჭიროებას - თეა წულუკიანმა აღნიშნულ პროცესში სამინისტროს ჩართულობის შესახებ მზაობა გამოთქვა.