ქვემო ქართლში სახელმწიფო რწმუნებული შოთა რეხვიაშვილი, რწმუნებულის მოადგილე, კახა კობერიძე და რეგიონული განვითარების სააგენტოს ხელმძღვანელი, მიხეილ ღურწკაია, რუსთავში, კულინარიული წიგნის ,,ეთნო ტაბლას“ პრეზენტაციას დაესწრნენ.

წიგნი USAID-ის პროექტის „ზრდა საქართველოში“ დახმარებითა და სახელმწიფო რწმუნებულის ადმინისტრაციის მხარდაჭერით გამოიცა, რომელიც ქვემო ქართლის რეგიონში მცხოვრები ეთნიკური უმცირესობების (სომხები, აზერბაიჯანელები, ასირიელები, ბერძნები, გერმანელები და ა.შ.) მიერ შემუშავებულ 30-მდე კერძის რეცეპტს აერთიანებს.

აღნიშნული კრებულის მიზანი ადგილობრივი კერძების პოპულარიზაცია და საზოგადოებაში რეგიონის შესახებ ცნობიერების ამაღლებაა. „ეთნო ტაბლას“ რეალიზაცია, სხვადასხვა წყაროებთან ერთად, დაგეგმილია წიგნების მაღაზიათა უმსხვილეს ქსელში „ბიბლუსში“ - მიღებული შემოსავალი სრულად მოხმარდება ქვემო ქართლის რეგიონული განვითარების სააგენტოს (KKRDA) გაძლიერებას.

ახალი კულინარიული წიგნის პრეზენტაციაზე USAID/საქართველოს ეკონომიკური განვითარების ოფისის დირექტორი, მარიკა ოლსენი, USAID-ის პროექტის „ზრდა საქართველოში“ ხელმძღვანელი ქეთევან ჭუმბურიძე და სხვა დაინტერესებული პირები იმყოფებოდნენ.

„ეთნო ტაბლა“ კულინარიული წიგნების სერიის მეხუთე გამოცემაა, სხვა გამოცემებს შორისაა: მესხური, კოლხური, თუშური და ქისტური ტაბლა.