ქვემო ქართლის რეგიონში მასობრივი იმუნიზაცია აქტიურად გრძელდება -  ვაქცინაციის პროცესში ამჯერად დმანისის მუნიციპალიტეტი ჩაერთო. ადგილზე ქვემო ქართლში სახელმწიფო რწმუნებული, შოთა რეხვიაშვილი, დმანისის მერის მოადგილესთან  ერთად იმყოფებოდა. 

სახელმწიფო რწმუნებული, ვაქცინაციის მიმდინარეობას პირადად გაეცნო, სამედიცინო პერსონალს გაესაუბრა, ადგილზე მყოფ მოქალაქეებს პროცესში ჩართულობისთვის მადლობა გადაუხადა და აღნიშნა, რომ საჭირეობის შემთხვევაში მოსახლეობის კლინიკამდე გადაადგილების უზრუნველყოფას ადგილობრივი მუნიციპალიტეტი განახორციელებს. ვაქცინაციის მაქსიმალური ხელმისაწვდომობისა და პროცესის გამარტივების  მიზნით კი, სოფლებში, მოძრავი ამბულატორიები განთავსდება. 

დღის განმავლობაში, covid 19-ის საწინაარმდეგო აცრა, მუნიციპალიტეტის რეგიონული ჯანდაცვის ცენტრში, ფაიზერის ვაქცინით, 80-მა მოქალაქემ ჩაიტარა - აიცრა დმანისის მერის მოადგილე, ბადრი სუბარიც, რომელმაც მასობრივი ვაქცინაციის აუცილებლობაზე და მოქალაქეთა გააქტიურების მნიშვნელობაზე გაამახვილა ყურადღება.  

აღსანიშნავია, რომ ქვემო ქართლის რეგიონში, ამ ეტაპამდე, სულ, 30 000-მდე მოქალაქეა ვაქცინირებული - კლინიკებში იმუნიზაცია ჯანმრთელობის მსოფლიო ორგანიზაციის მიერ ავტორიზებული ვაქცინებით „სინოფარმი“, „სინოვაკი“, „ასტრაზენეკა” და ,,ფაიზერით“ კეთდება. რეგისტრაცია შესაძლებელია, როგორც ელექტრონული პორტალის - https://booking.moh.gov.ge მეშვეობით, ასევე, პირდაპირი ვიზიტის დროსაც. გარდა ამისა, ადგილის დასაჯავშნად, მოქმედებს ერთიანი სამთავრობო ცხელი ხაზის სპეციალური ნომერი - 144-3.