სახელმწიფო მინისტრის აპარატი COVID-19-ის პრევენციისა და ვაქცინაციის პროცესის შესახებ, ეთნიკური უმცირესობების წარმომადგენელთა ინფორმირების განაგრძობს. 

საინფორმაციო კამპანიის ფარგლებში, შერიგებისა და სამოქალაქო თანასწორობის საკითხებში სახელმწიფო მინისტრი, თეა ახვლედიანი, ქვემო ქართლში სახელმწიფო რწმუნებულთან, შოთა რეხვიაშვილთან ერთად, რეგიონის მუნიციპალიტეტების ხელმძღვანელ პირებს შეხვდა, სომხურ და აზერბაიჯანულ ენებზე მომზადებული საინფორმაციო მასალები გადასცა და მასობრივი ვაქცინაციის მნიშვნელობაზე ისაუბრა. 

მოსახლეობის ვაქცინაციის პროცესში ჩართვის აუცილებლობაზე გაამახვილა ყურადღება ქვემო ქართლში სახელმწიფო რწმუნებულმა, შოთა რეხვიაშვილმაც და მინისტრს, რეგიონში ამ მიმართულებით, არსებულ ვითარებაზე, დეტალური ინფორმაცია გააცნო. 

დღის განმავლობაში, გაიმართა შეხვედრა მარნეულის მუნიციპალიტეტის სოფელ წოფში, სადაც ხელისუფლების წარმომადგენლები, ადგილზე მცხოვრებ, ეთნიკურად სომეხ და აზერბაიჯანელ მოსახლეობას ვაქცინაციის მნიშვნელობის შესახებ პირადად ესაუბრნენ. 

კამპანიის ფარგლებში, სახელმწიფო უწყებების ხელმძღვანელმა პირებმა, მოსახლეობას საინფორმაციო ბროშურები და სამედიცინო პირბადეები გადასცეს.