ქვემო ქართლში სახელმწიფო რწმუნებულის ადმინისტრაციაში, ხელისუფლებისა და ბიზნეს სექტორის წარმომადგენლებმა, გარემოსდაცვითი პასუხისმგებლობის შესახებ მიღებული კანონის აღსრულებასთან დაკავშირებით, რომელიც ძალაში მიმდინარე წლის 1 ივნისს შედის, სამუშაო შეხვედრის ფორმატში იმსჯელეს. 

ბიზნეს სექტორთან გამართულ შეხვედრას, საქართველოს პარლამენტის წევრები - ალექსანდრე დალაქიშვილი და ნინო ლაცაბიძე, ქვემო ქართლში სახელმწიფო რწმუნებული შოთა რეხვიაშვილი, რუსთავის მერი ირაკლი ტაბაღუა, ქვემო ქართლის რეგიონული განვითარების სააგენტოს ხელმძღვანელი, მიხეილ ღურწკაია, გარემოსდაცვითი ზედამხედველობის დეპარტამენტის უფროსის მოადგილე - მთავარი სახელმწიფო ინსპექტორი ნელი კორკოტაძე, საქართველოს ბიზნეს ასოციაციის დირექტორი ლევან ვეფხვაძე და არასამთავრობო და სამოქალაქო სექტორის წარმომადგენლები დაესწრნენ.

მხარეებმა დიალოგის რეჟიმში განიხილეს კანონის იმპლემენტაციის ნაწილში კერძო სექტორის მიერ განსახორციელებელი კონკრეტული ღონისძიებები, რომელიც საწარმოო პროცესში, თანამედროვე და გარემოსთვის უსაფრთხო ტექნიკური ბაზის უზრუნველყოფას ითვალისწინებს. დაიგეგმა მორიგი სამუშაო შეხვედრა, რომელიც მხარეთა ჩართულობით უახლოეს პერიოდში გაიმართება.
 
აღსანიშნავია, რომ საკითხის განხილვა საქართველოს პარლამენტის გარემოს დაცვისა და ბუნებრივი  რესურსების კომიტეტის წევრების - ალექსანდრე დალაქიშვილის და  რუსთავისა და გარდაბნის ათი თემის მაჟორიტარი დეპუტატის, ნინო ლაცაბიძის ინიციატივით და ქვემო ქართლის რეგიონული განვითარების სააგენტოს ორგანიზებით განხორციელდა.