ქვემო ქართლში სახელმწიფო რწმუნებული, შოთა რეხვიაშვილი, საქართველოს პირველი რესპუბლიკის დროს დემოკრატიულად არჩეული ადგილობრივი თვითმმართველობების შექმნის 100 წლისთავისადმი მიძღვნილ ღონისძიებას დაესწრო.

ბოლნისის მუნიციპალიტეტის საკონფერენციო დარბაზში მოეწყო გამოფენა, სადაც წარმოდგენილი იყო 1918-21 წლების თვითმმართველი ორგანოების შესახებ სხვადასხვა არქივში დაცული მასალები. თემის შესახებ ისტორიკოსებმა, ირაკლი ხვადაგიანმა და დავით ლოსაბერიძემ, ისაუბრეს, დამსწრე საზოგადოებას სიტყვით მიმართეს რეგიონისა და მუნიციპალიტეტის ხელმძღვანელმა პირებმა, გაიმართა დოკუმენტური ფილმის ჩვენება სახელწოდებით - „ინიციატივა არ ისჯება”, რომელსაც მკვლევარი ანა მარგველაშვილი გაუძღვა.

ღონისძიება, გერმანია-საქართველოს ურთიერთთანამშრომლობის ფარგლებში, გერმანიის ეკონომიკური განვითარებისა და თანამშრომლობის ფედერალური სამინისტროს და გერმანიის საერთაშორისო თანამშრომლობის საზოგადოების ფინანსური მხარდაჭერით გაიმართა. თემატური ექსპოზიცია საქართველოს რეგიონალური განვითარებისა და ინფრასტრუქტურის სამინისტროს მხარდაჭერითა და საქართველოს ეროვნული არქივის პარტნიორობით მოეწყო.