ბოლნისის მუნიციპალიტეტში, რეგიონში არსებული კულტურული მემკვიდრეობის უძრავი ძეგლების დაცვისა და მოვლა-პატრონობის საკითხების შესახებ იმსჯელეს.

საინფორმაციო შეხვედრა საქართველოს კულტურული მემკვიდრეობის დაცვის ეროვნული სააგენტოს ინიციატივის საფუძველზე გაიმართა და მიზნად ზოგადი სამოქმედო პრინციპების შეთანხმებასა და დახვეწას ისახავდა.

შეხვედრას ქვემო ქართლში სახელმწიფო რწმუნებულის მოადგილე, კახა კობერიძე, საქართველოს კულტურული მემკვიდრეობის დაცვის ეროვნული სააგენტოს გენერალური დირექტორი, ნიკოლოზ ანთიძე, კომპანია „RMG“ - ს აღმასრულებელი დირექტორის მოადგილე, ამირან ქართველიშვილი, ორგანიზაცია „საყდრისის კომიტეტი კულტურული მემკვიდრეობისთვის“ წარმომადგენლობითი ჯგუფი, რეგიონის მუნიციპალიტეტების ხელმძღვანელი პირები და შესაბამისი სამსახურების წარმომადგენლები დაესწრნენ.

შეხვედრის მიმდინარეობისას საუბარი შეეხო კულტურული მეკვიდრეობის შესახებ საზოგადოების ცნობიერების ამაღლებას, საგანმანათლებლო-შემეცნებითი პროგრამების წარმოებას და მათი განხორციელების ხელშეწყობას. ასევე, იმსჯელეს რეგიონში არსებული კულტურული მემკვიდრეობის ძეგლების მოვლა- პატრონობასა და სარეაბილიტაციო სამუშაოებისთვის თვითმმართველობების ბიუჯეტში, სამომავლოდ, ფინანსური რესურსის განსაზღვრაზე.

იგეგმება მუნიციპალიტეტების მონაწილეობა ინდუსტრიული მემკვიდრეობის ძეგლების რენოვაციისა და მოდერნიზების პროექტების მომზადებისა და განხორციელების პროცესში .

მხარეთა შორის თანამშრომლობა შეეხება თვითმმართველობების ტერიტორიულ ერთეულებში არსებული სამუზეუმო ინფრასტრუქტურის სამომავლო მოწყობისა და თანამედროვე განვითარების საკითხებსაც.
აღსანიშნავია, რომ მიმდინარე წელის ზაფხულში, ქვემო ქართლის მუნიციპალური ერთეულები, საქართველოს კულტურული მემკვიდრეობის დაცვის ეროვნულ სააგენტოსთან ერთად, მოაწყობენ კულტურული მემკვიდრეობის ფორუმს.