წყლის რესურსების დაცვის საერთაშორისო დღესთან დაკავშირებით, ,,საქართველოს მწვანეთა მოძრაობა/დედამიწის მეგობრები-საქართველო’’-ს ინიციატივითა და ქალაქის მერიის ხელშეწყობით, რუსთავში დასუფთავების აქცია მოეწყო.

გარემოსდაცვითი კამპანიების - ,,დავასუფთაოთ საქართველო’’ და ,,ლურჯი ნაკადული’’ ფარგლებში გამართულ აქციას, შვედეთის სამეფოს ელჩი საქართველოსა და სომხეთში, ულრიკ ტიდესტრომი, შვედეთის საერთაშორისოგანვითარებისა და თანამშრომლობის მინისტრი პეტერ ერიქსონი, ქვემო ქართლში სახელმწიფო რწმუნებულის მოადგილეები ზვიად ჭუნაშვილი და კახა კობერიძე, რუსთავის მერის მოადგილე გოჩა ლორია, საკრებულოს თავმჯდომარე ლევან ონიანი, ადგილობრივი თვითმმართველობის წევრები და სკოლის მოსწავლეები შეუერთდნენ.

აქციის მონაწილეებმა ბოსტანქალაქის ქუჩაზე, #3 საცხოვრებელი კორპუსის მიმდებარე ტერიტორია დაასუფთავეს და ფიჭვის ხის 10 ნერგი დარგეს.

,,საქართველოს მწვანეთა მოძრაობა/დედამიწის მეგობრები-საქართველო’’-ს ინიციატივითა და ადგილობრივი მუნიციპალიტეტების თვითმმართველობების მხარდაჭერით, წყლის რესურსების დაცვის საერთაშორისო დღისადმი მიძღვნილი გარემოსდაცვითი კამპანია ,,ლურჯი ნაკადული’’, საქართველოს მასშტაბით, 2011 წლიდან ტარდება.

წყლის რესურსების დაცვის საერთაშორისო დღეს, მთელ მსოფლიოში ყოველწლიურად, 22 მარტს, გაეროს გენერალური ასამბლეის გადაწყვეტილებით, 1993 წლიდან აღნიშნავენ.