28 დეკემბერს, საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილემ, გრიგოლ გიორგაძემ, ქვემო ქართლში სახელმწიფო რწმუნებულმა შოთა რეხვიაშვილმა და საარსებო წყაროებით უზრუნველყოფის სააგენტოს დირექტორის მოვალეობის შემსრულებელმა თამარ გავაშელმა, თეთრიწყაროს მუნიციპალიტეტის ხელმძღვანელ პირებთან ერთად, „მეწარმე სუბიექტთა მხარდაჭერის პროგრამის“ ფარგლებში დაფინანსებული საწარმო მოინახულეს.

მეწარმე, ზურაბ ბორცვაძე, თეთრიწყაროს მუნიციპალიტეტში მეფრინველეობას 2011 წლიდან ეწევა და ამ დრომდე, ადგილზე, მხოლოდ ქათმის საინკუბაციო და სასურსათო კვერცხს აწარმოებდა. საარსებო წყაროებით უზრუნველყოფის სააგენტომ დევნილ მეწარმეს ორი დასახელების ინკუბატორი, გენერატორი, საწარმოო მაცივარი და ავზი შეუსყიდა. სახელმწიფო დახმარების ჯამურმა ღირებულებამ 9795 ლარი შეადგინა.

აღსანიშნავია, რომ პროგრამაში გამარჯვების შემდეგ მცირე ბიზნესის გაფართოებას და წიწილის და ხორცის წარმოებასაც შეძლებს. ამასთანავე, მინიმუმ ერთ ადგილობრივ დევნილს ან ეკომიგრანტს დაასაქმებს.

მეწარმე სუბიექტთა მხარდაჭერა, EPIC პროგრამის ფარგლებში, გერმანიის ფედერალური მთავრობის და საქართველოს მთავრობის ხელშეწყობით ხორციელდება.