12 აგვისტოს თეთრიწყაროს მუნიციპალიტეტში სახალხო დღესასწაული ,,დიდგორობა 2017“ მრავალფეროვანი პროგრამით აღინიშნა. 

ღონისძიებაზე საქართველოს პრემიერ-მინისტრი გიორგი კვირიკაშვილი, მინისტრთა კაბინეტის წარმომადგენლებთან ერთად იმყოფებოდა.

„თითოეულ თქვენგანს განსაკუთრებული სიამაყით გილოცავთ ამ უმნიშვნელოვანეს დღეს - ჩვენი ქვეყნის ერთიანობისა და სიძლიერის სიმბოლოდ ქცეულ თარიღს.
დღეს, ჩვენ, ყველა ერთად, წარსულის დიდი პატივისცემითა და უკეთესი მომავლის შენების სურვილით ვიმყოფებით დიდგორის ველზე, სადაც საუკუნეების წინ დავით აღმაშენებლის მეთაურობით, ჩვენმა წინაპრებმა დიდი გამარჯვება იზეიმეს.
თითოეული თავდადებული ქართველის მონდომება და ქვეყნის გაერთიანების პროცესში შეტანილი განსაკუთრებული წვლილი ჩვენთვის სამაგალითოა და მჯერა ყველა ერთად შევძლებთ ჩვენი ქვეყნის განვითარებასა და გამთლიანებას“, - ამ სიტყვებით მიმართა ქვემო ქართლში სახელმწიფო რწმუნებულმა-გუბერნატორმა გრიგოლ ნემსაძემ ღონისძიების სტუმრებს და ცენტრალური და ადგილობრივი ხელისუფლების წარმომადგენლებთან ერთად დაესწრო დღის განმავლობაში მიმდინარე კულტურულ და სპორტულ აქტივობებს.