საქართველოს პრემიერ-მინისტრის ინიციატივით დაწყებული დევნილთა განსახლების მასშტაბური პროექტის მიმდინარეობას გიორგი დოხტურიშვილი რუსთავის მერთან, ნინო ლაცაბიძესთან და დევნილთა, ეკომიგრანტთა და საარსებო წყაროებით უზრუნველყოფის სააგენტოს დირექტორთან, ზურაბ უტიაშვილთან ერთად ადგილზე გაეცნო.

2025 წლის ბოლომდე, ოკუპირებული ტერიტორიებიდან იძულებით გადაადგილებულ 13 000 ოჯახს ახალი საცხოვრებელი ფართი გადაეცემა. პროექტის ფარგლებში, რუსთავში, მე-18 მიკრორაიონის მიმდებარედ, ოთხი 10-სართულიანი, 800 ბინაზე გათვლილი ახალი საცხოვრებელი კომპლექი შენდება.

საცხოვრებელი კორპუსების მშენებლობა 2025 წლისთვის უნდა დასრულდეს და მისი ღირებულება 80 971 596 ლარია. თანამედროვე სტანდარტების შესაბამისი ბინები დევნილ ოჯახებს დასრულებული რემონტით გადაეცემათ.

პროექტის თანახმად, 13 000 დევნილი ოჯახიდან 7000-ზე მეტი ბინას ახალაშენებულ კორპუსებში მიიღებს, 6000-მდე ოჯახი კი ,,სოფლად სახლის’’ პროგრამის ფარგლებში განსახლდება. ორივე პროგრამის ბიუჯეტი, ჯამში, დაახლოებით, 900 მილიონ ლარს შეადგენს.

დევნილი ოჯახებისთვის ღირსეული საცხოვრებელი პირობების შექმნის მიზნით, საცხოვრებელი კორპუსების მშენებლობა საქართველოს 5 ქალაქში - რუსთავში, თბილისში, ქუთაისში, ზუგდიდსა და ბორჯომში მიმდინარეობს.