საქართველოს რეგიონული განვითარებისა და ინფრასტრუქტურის მინისტრი, ირაკლი ქარსელაძე, ქვემო ქართლში სახელმწიფო რწმუნებული გიორგი დოხტურიშვილი, მუნიციპალური განვითარების ფონდის აღმასრულებელი დირექტორი, დავით ტაბიძე და ქალაქის მერი, ნინო ლაცაბიძე, რუსთავში, საერთაშორისო სტანდარტების, მრავალფუნქციური სპორტული კომპლექსის მშენებლობის პროცესს გაეცნენ.

პროექტს, რომლის ღირებულება 20 მილიონ ლარამდეა, აზიის განვითარების ბანკის დაფინანსებით, საქართველოს რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდი ახორციელებს.

ორსართულიანი დახურული ტიპის სპორტული კომპლექსი 1500 მაყურებელზეა გათვლილი და მასში სპორტის სხვადასხვა სახეობის, კერძოდ, კრივის, კალათბურთის, ხელბურთისა და მინი ფეხბურთის დარბაზები მოეწყობა. 

შენობაში გათვალისწინებულია გასახდელების, საკონფერენციო დარბაზის, ინვენტარის შესანახი, დასასვენებელი ოთახებისა და სველი წერტილების მოწყობა. ადგილზე განთავსდება ღია კაფე, ავტოპარკინგი და სარეკრეაციო ზონა, მოწესრიგდება საფეხმავლო ბილიკები, რომელთა გასწვრივაც გარე განათების ლამპიონები დამონტაჟდება, მოხდება ტერიტორიის გამწვანებაც.

მშენებლობის დასრულება 2022 წლის ბოლოსთვისაა დაგეგმილი.