მარნეულის მუნიციპალიტეტის სოფელ ყიზილაჯლოში სოკარ ენერჯი ჯორჯიას მიერ აშენებული სპორტული კომპლექსი გაიხსნა, რომელიც კომპანიამ სახელმწიფოს უსასყიდლოდ გადასცა.

კომპლექსის გახსნის ღონისძიებაზე, ქვემო ქართლში სახელმწიფო რწმუნებულმა, საქართველოს პრემიერ-მინისტრს, მთავრობის წევრებს, დიპლომატიური კორპუსის წარმომადგენლებს, კომპანია სოკარისა და სოკარ ენერჯი ჯორჯიას პრეზიდენტსა და გენერალურ დირექტორს, არსებული მხარდაჭერისა და გაწეული საქმიანობისთვის მადლობა გადაუხადა და რეგიონის მასშტაბით, კომპანიის მიერ განხორცილებულ უმნიშვნელოვანეს პროექტებზე ისაუბრა.

შოთა რეხვიაშვილმა, სიტყვით გამოსვლისას, ქვეყნებს შორის არსებულ მრავალწლიან პარტნიორულ, სტრატეგიულ და მეგობრულ ურთიერთობებზე გაამახვილა ყურადღება და აღნიშნა, რომ მთავრობის მეთაურის ადგილზე ყოფნა ამ ყველაფრის ნათელი დადასტურებაა.

აღსანიშნავია, რომ სოფელ ყიზილაჯლოს კომპლექსი წარმოადგენს დახურულ მულტიფუნქციურ სპორტულ სივრცეს სხვადასხვა სახეობებისათვის, როგორიცაა: კალათბურთი, მინი-ფეხბურთი, ხელბურთი, ფრენბურთი და ჭიდაობა.
ადგილზე განთავსებულია ტრიბუნები, გასახდელები, საშხაპე და სანიტარული ფართები, ინვენტარის შესანახი საწყობი და ადმინისტრაციული სივრცეები.

შენობის ჯამური ფართი 1157 კვადრატული მეტრია. პროექტის ღირებულება 3 მილიონ ლარზე მეტს შეადგენს. სპორტული კომპლექსის მიმდებარედ სოკარმა სრული რეაბილიტაცია ჩაუტარა საფეხბურთო სტადიონს.