რუსთავში საბავშვო ბაღების ეზოების კეთილმოწყობა აქტიურად მიმდინარეობს.

ქვემო ქართლში სახელმწიფო რწმუნებულმა, შოთა რეხვიაშვილმა, სამხარეო ადმინისტრაციისა და მუნიციპალიტეტის ხელმძღვანელ პირებთან ერთად, რუსთავში ინფრასტრუქტურის სამინისტროს რეგიონული განვითარების ფონდისა და ადგილობრივი ბიუჯეტის თანადაფინანსებით მიმდინარე პროექტების მონიტორინგი განახორციელა.

რუსთავში წელს, ცენტრალური და ადგილობრივი ბიუჯეტიდან, 25 მილიონი ლარის ღირებულების  ინფრასტრუქტურული პროექტები ხორციელდება - საიდანაც 15 ადგილობრივი,  ხოლო 10 მილიონი რეგიონული განვითარების ფონდის დაფინანსებას შეადგენს.

ქალაქის მასშტაბით, აქტიურადაა დაწყებული რეაბილიტაციის პროცესი 6 სააღმზრდელო დაწესებულებაში. ამ დროისთვის,  სამუშაოები #17, #18, #20, #21, #31 და #43  ბაღების ეზოებს უტარდება. პროექტი გარე საკანალიზაციო ქსელის, ბორდიურებისა და ასფალტ-ბეტონის საფარის მოწყობას ითვალისწინებს, რომლის ღირებულება 648,438 ლარს შეადგენს და მთლიანად ადგილობრივი ბიუჯეტიდან ფინანსდება. რეაბილიტაციის პროცესი აგვისტოში დაიწყო და ოქტომბრის თვეში დასრულდება.  აღსანიშნავია, რომ ქალაქში არსებული საბავშვო ბაღების აშენებისა და ექსპლუატაციის შემდეგ, ეზოების კეთილმოწყობა აქამდე არასდროს მომხდარა და წელს პირველად ხორციელდება.

დასრულების ეტაპზეა ახალგაზრდობის პარკში და რუსთავის თეატრის მიმდებარედ არსებული სკვერების სარეაბილიტაციო სამუშაობი. პროექტის ფარგლებში, სპორტული და გასართობი მოედნები, მოსასვენებელი ადგილები, შადრევნები, სასეირნო ბილიკები, მწვანე საფარი და სველი წერტილები მოეწყობა. სამუშაოები რეგიონული განვითარების ფონდიდან და ადგილობრივი ბიუჯეტიდან ფინანსდება და  მათი საერთო ღირებულება 3 მილიონ ლარზე მეტია.