ქვემო ქართლში სახელმწიფო რწმუნებული, შოთა რეხვიაშვილი, პროექტების მონიტორინგის ფარგლებში, მოადგილესთან და მარნეულის მერის მოვალეობის შემსრულებელთან ერთად, მუნიციპალიტეტში ინფრასტრუქტურული სამუშაოების მიმდინარეობის პროცესს გაეცნო.

ამ ეტაპზე, მუნიციპალიტეტში ცენტრალური და ადგილობრივი ბიუჯეტის ერთობლივი დაფინანსებით, აქტიურად ხორციელდება საგზაო და საგანმანათლებლო ინფრასტრუქტურის მშენებლობა-რეაბილიტაციის პროექტები და სასმელი წყლის სისტემების მოწყობის სამუშაოები.

დასკვნით ეტაპზეა გზის მშენებლობა მარნეულში, იძულებით გადაადგილებული ოჯახებისთვის, ახლადაშენებულ სოფლის ტიპის დასახლებაში. საერთო ჯამში ადგილზე 2 189 მეტრი სიგრძის გზის მოწყობისთვის 758 636 ლარია გათვალისწინებული.

სრულად განახლდა სოფლამდე მისასვლელი გზა, ქუთლიარის ადმინისტრაციულ ერთეულში, დოლისყანის დასახლებაში. 1 306 მეტრი სიგრძის მონაკვეთზე 279 282 ლარის ღირებულების სამუშაოები განხორციელდა.

სასმელი წყლის მაგისტრალური მილი იცვლება სოფელ ხოჯორნში - პროექტის დასრულების შემდეგ, ადგილობრივი მოსახლეობა სრულად იქნება უზრუნველყოფილი ხარისხიანი სასმელი წყლით. აღნიშნული სამუშაოები ცენტრალური და ადგილობრივი ბიუჯეტიდან 237 095 ლარით ფინანსდება.

აქტიურ ფაზაშია სააღმზრდელო დაწესებულებების მშენებლობა-რეაბილიტაციის პროცესი სოფელ ყიზილაჯლოში და მარნეულის #1 საბავშვო ბაღში. ადგილზე სამუშაოები პროექტით გათვალისწინებულ ვადებში მიმდინარეობს - მათი საერთო ღირებულება, დაახლოებით, 2 მილიონ ლარს შეადგენს.