სოფელ მუღანლოს უწყვეტი წყალმომარაგებისთვის სისტემების მშენებლობა აქტიურად გრძელდება

რეგიონული განვითარებისა და ინფრასტრუქტურის სამინისტროს წყალმომარაგების კომპანია, გარდაბნის მუნიციპალიტეტის სოფელ მუღანლოს წყლის სისტემების მშენებლობას აქტიურად აგრძელებს.

მიმდინარე სამუშაოებს ინფრასტრუქტურის მინისტრის პირველი მოადგილე, ილია ბეგიაშვილი, ქვემო ქართლში სახელმწიფო რწმუნებული, შოთა რეხვიაშვილი, პარლამენტში რუსთავისა და გარდაბნის ათი თემის მაჟორიტარი დეპუტატი, ნინო ლაცაბიძე, წყალმომარაგების კომპანიის დირექტორი, ალექსანდრე თევდორაძე და ადგილობრივი მუნიციპალიტეტის ხელმძღვანელი პირები ადგილზე გაეცნენ.

სოფელ მუღანლოს წყალმომარაგების სისტემის რეაბილიტაცია სახელმწიფო ბიუჯეტიდან 6 მილიონი ლარით ფინანსდება. სამუშაოების ფარგლებში ადგილზე ახალი ქსელის მოწყობა და ორი რეზერვუარის მშენებლობა მიმდინარეობს.

პროექტის დასრულება 2022 წლის გაზაფხულისთვის იგეგმება - შედეგად ადგილობრივი მოსახლეობა უწყვეტი, ხარისხიანი წყალმომარაგებით, ათეული წლების შემდეგ, პირველად ისარგებლებს.