ქვემო ქართლში სახელმწიფო რწმუნებულის პირველი მოადგილე, ზვიად ჭუნაშილი და რუსთავის მერის პირველი მოადგილე, ბესიკ ტოგონიძე, შესაბამისი სამსახურის წარმომადგენლებთან ერთად, ქალაქში ინფრასტრუქტურული პროექტების მიმდინარეობას გაეცნენ.

კორონავირუსის (COVID-19) პრევენციული ღონისძიებების პარალელურად, რუსთავში აქტიურად მიმდინარეობს ერთ-ერთი ყველაზე მასშტაბური პროექტი, რომელიც ძველი რუსთავის ცენტრალური ქუჩის - კოსტავას გამზირის რეაბილიტაციას ითვალისწინებს.

ტერიტორიაზე უკვე შეცვლილია მიწისქვეშა კომუნიკაციები - სანიაღვრე და წყალსადენის სისტემები. დაიგო ასფალტის საფარი და რეკონსტრუქცია-რეაბილიტაცია ჩაუტარდა შენობების ფასადებს. ფილაქნებით მოპირკეთდება ტროტუარები, გამზირის შუაგამყოფ ზოლში, კი სკვერები მოეწყობა. პროექტის ღირებულება 3 მლნ 700 000 ლარია.
შეუფერხებლად ხორციელდება ინფრასტრუქტურული პროექტები ქალაქის სხვა ლოკაციებზეც.

მიმდინარეობს ავტოსადგომის რეაბილიტაცია, დაწყებულია ფასადების რეკონსტრუქციისა და გზის საფარის აღდგენის სამუშაოები ჭყონდიდელის დასახლებაში. გზის საფარის აღდგენის სამუშაოები მიმდინარეობს წერეთლის ქუჩაზეც, სადაც ასფალტ-ბეტონის საფარი 11 ლოკაციაზე შეიცვლება. აქტიურად მიმდინარეობს გიორგი ლეონიძის სახელობის სკვერის რეაბილიტაციაც, სადაც მასშტაბური რეკრეაციული სივრცე ეწყობა.

აღსანიშნავია, რომ მიმდინარე წელს, რუსთავში, დაახლოებით 22 მილიონი ლარის ღირებულების ინფრასტრუქტურული სამუშაოების განხორციელებაა დაგეგმილი.