საქართველოს ვიცე-პრემიერი, რეგიონული განვითარებისა და ინფრასტრუქტურის მინისტრი, მაია ცქიტიშვილი და ქვემო ქართლში სახელმწიფო რწმუნებული, შოთა რეხვიაშვილი, სავტომობილო გზების დეპარტამენტის თავმჯდომარესა და ადგილობრივი ხელისუფლების წარმომადგენლებთან ერთად, თეთრიწყაროსა და წალკის მუნიციპალიტეტებში, საგზაო პროექტების მიმდინარეობას გაეცნენ.

მსოფლიო ბანკის ფინანსური მხარდაჭერით, უკვე დასრულდა პანტიანი-მანგლისის გზის რეაბილიტაცია, რომელიც კოდა-მანგლისი-ფარცხისი-წალკა-ნინოწმინდის საავტომობილო გზას უერთდება და თბილისთან დამაკავშირებელი უმოკლესი მონაკვეთია.

გზაზე, სადაც ამ დრომდე საავტომობილო მოძრაობა შეფერხებით ხორციელდებოდა, უსაფრთხო და კომფორტული გადაადგილების უზრუნველსაყოფად, მოეწყო ახალი ასფალტ-ბეტონის საფარი, ტროტუარები, წყალგამტარი მილები და ავტოპავილიონები. უსაფრთხოების გაუმჯობესების მიზნით, განთავსდა საგზაო ნიშნები და დამცავი ზღუდარები.

სრულად რეაბილიტირდა კოდა-მანგლისი-ფარცხისი-წალკა-ნინოწმინდის 16 კმ-იანი მონაკვეთიც. პროექტის ფარგლებში მოეწყო ტროტუარები და ეზოებში შესასვლელები, ადგილზე განთავსდა საგზაო ნიშნები. გზის განახლებული ინფრასტრუქტურით სარგებლობს მუნიციპალიტეტის სოფლები: ტბეთი, სამება, განთიადი, საყდრიონი და აიაზმა.