15 მაისს, ქვემო ქართლში სახელმწიფო რწმუნებულმა, შოთა რეხვიაშვილმა, პირველ მოადგილესთან, ზვიად ჭუნაშვილთან ერთად, თეთრიწყაროს მუნიციპალიტეტში, ცენტრალური და ადგილობრივი ბიუჯეტის დაფინანსებით მიმდინარე და დასრულებული პროექტები მოინახულა. 

მონიტორინგის პროცესს, სახელმწიფო რწმუნებლთან ერთად, მუნიციპალიტეტის მერი, გიორგი ქორიძე და შესაბამისი სამსახურების წარმომადგენლები ესწრებოდნენ. მხარისა და ადგილობრივი ხელისუფლების წარმომადგენლები კონტრაქტორი კომპანიების თანამშრომლებს შეხვდნენ და სამუშაოების წარმოების შესახებ ინფორმაცია დეტალურად მოისმინეს. 

აღსანიშნავია, რომ თეთრიწყაროს მუნიციპალიტეტში, ამ ეტაპზე, აქტიურად მიმდინარეობს კოდა-ვაშლოვანის დამაკავშირებელი საავტომობილო გზის რეაბილიტაცია. პროექტის ფარგლებში მოეწყობა ბეტონის საფარი, შედეგად, ადგილობრივი მოსახლეობა, ცენტრალურ საავტომობილო გზას, უმოკლესი და კომფორტული საგზაო ინფრასტრუქტურით დაუკავშირდება. 

შიდა საავტომობილო გზების მოწესრიგება მიმდინარეობს ქალაქ თეთრიწყაროში, გურამიშვილის, წმინდა ნინოს, ჭავჭავაძის, მარაბდის და აბანოს ქუჩებზე. საერთო ჯამში, 2019 წელს, ქალაქში, რეაბილიტაცია ჩაუტარდება 5 ქუჩას და მოასფალტდება 2 კმ-ზე მეტი შიდა საავტომობილო გზა. 

შოთა რეახვიაშვილი, პროექტების მონიტორინგის ფარგლებში, უკვე დასრულებულ სამუშაოებსაც გაეცნო და ადგილზე დაათვალიერა სოფელ ასურეთში, ახლადრეაბილიტირებული რუსთაველის ქუჩა, სადაც მოასფალტდა საავტომობილო გზა და მიმდებარე 2 ჩიხი, ასევე, მოეწყო სანიაღვრე კიუვეტები. 

ქალაქ თეთრიწყაროში დასრულდა სპორტული მოედნის სარეაბილიტაციო სამუშაოები. შესაბამისად, ადგილობრივებს უკვე, აქვთ შესაძლებლობა თანამედროვე სპორტული ინფრასტრუქტურით ისარგებლონ. 

აღსანიშნავია, რომ მუნიციპალიტეტში აქტიურად მიმდინარეობს საგანმანათლებლო სივრცეების მოწყობა-მოწესრიგების სამუშაოებიც. წლის განმავლობაში, აშენდება 3 ახალი სკოლა და რეაბილიტაცია ჩაუტარდება 11-ს. ასევე, განხორციელდება სკოლამდელი აღზრდის 2 დაწესებულების მშენებლობა.