საქართველოს კულტურის, სპორტისა და ახალგაზრდობის მინისტრის ინიციატივით, შემოქმედებითი საქმიანობის ხელშეწყობის მიზნით, ყოფილი მე-12 პენიტენციური დაწესებულება ორთაჭალაში ალტერნატიულ კულტურულ სივრცედ გადაკეთდა.

„ალტერნატიული კულტურული სივრცე N12“ - ასეთია დღეიდან ამ ადგილის სახელწოდება, რომელიც მარნეულის მუნიციპალიტეტის კულტურის ცენტრის თეატრალური დასის სპექტაკლით „მარინა რევია“ (რეჟისორი გოჩა ხვიჩია) გაიხსნა.

ღონისძიებას საქართველოს კულტურის, სპორტისა და ახალგაზრდობის მინისტრი, თეა წულუკიანი,  ქვემო ქართლში სახელმწიფო რწმუნებულის მოადგილე, კახა კობერიძე, საქართველოს პარლამენტში მუნიციპალიტეტის მაჟორიტარი დეპუტატი, ზაურ დარგალი, მარნეულის მერის მოვალეობის შემსრულებელი, ზაურ ტაბატაძე, ხელოვნებათმცოდნეები და კულტურის სფეროს  წარმომადგენლები დაესწრნენ.

აღსანიშნავია, რომ მულტიფუნქციური სივრცით სარგებლობა შეეძლება ნებისმიერ ხელოვანს - პროფესიულ თუ მოყვარულ დასებს როგორც თბილისიდან, ისე რეგიონებიდან, საშუალება ექნებათ, ისარგებლონ სარეპეტიციო სივრცით, გამართონ სპექტაკლები, კონცერტები და სხვადასხვა შემეცნებითი ღონისძიებები.