რუსთავის ისტორიულ მუზეუმში, ვახტანგ გზირიშვილის ბიოგრაფიაზე დაყრდნობით შექმნილი წიგნის პრეზენტაცია და მისი ხსოვნისადმი მიძღვნილი საღამო გაიმართა.

ღონისძიებას საქართველოს თავდაცვის მინისტრი, ჯუანშერ ბურჭულაძე, თავდაცვის ძალების მეთაური, გენერალ-მაიორი გიორგი მათიაშვილი, თავდაცვის და უშიშროების საბჭოს თავმჯდომარის მოადგილე ვლადიმერ ჩაჩიბაია, ქვემო ქართლში სახელმწიფო რწმუნებული, შოთა რეხვიაშვილი რუსთავის მერი, ირაკლი ტაბაღუა, საქართველოს პარლამენტში რუსთავის მაჟორიტარი დეპუტატი, ნინო ლაცაბიძე, ადგილობრივი ხელისუფლების ოფიციალური პირები, ვახტანგ გზირიშვილის დედა და ოჯახის წევრები დაესწრნენ.

ღონისძიებაზე მიწვეულ ყველა სტუმარს  მარინა გზირიშვილის ავტორობით გამოცემული  წიგნი - ,,არ დაიდარდო დედაო“ გადაეცა საჩუქრად. მუზეუმის საექსპოზიციო სივრცეში კი,  ვახტანგ გზირიშვილის ფოტოებისა და ნივთების გამოფენა მოეწყო.  

2008 წლის აგვისტოს ომის გმირი, კაპრალი ვახტანგ გზირიშვილი მე-4 ქვეითი ბრიგადის 42-ე ბატალიონში მსახურობდა. ვახტანგ გზირიშვილი მეტყვიამფრქვევე იყო, ის 8 აგვისტოს, ცხინვალის შესასვლელთან, დაბომბვას ემსხვერპლა, გარდაცვალების შემდეგ, მას, ვახტანგ გორგასლის სახელობის პირველი ხარისხის ორდენი მიენიჭა.