რუსთავში, დემოკრატიული ჩართულობის ცენტრში, ქვემო ქართლში სახელმწიფო რწმუნებულის ადმინისტრაციის მხარდაჭერით, ფერმერ ქალთა ასოციაციის და UNDP-ის პროექტის - "სოფლად ქალთა ეკონომიკური გაძლიერების ხელშეწყობა" შემაჯამებელი შეხვედრა გაიმართა.

აქტივობაში მონაწილეობა ქვემო ქართლის რეგიონში, აგროტურიზმსა და სოფლის მეურნეობის სხვადასხვა დარგში ჩართულმა პირებმა მიიღეს. ბენეფიციარებს პროექტის მიმდინარეობისას, საქმიანობის წარმატებულად განსახორციელებლად სხვადასხვა სახის ინვენტარი გადაეცათ, ასევე ჩაუტარდათ თემატური ტრენინგები.

პროექტით გათვალისწინებული დარგობრივი ტრენინგების შემაჯამებელი შეხვედრაზე დამსწრე პირებს სიტყვით ფერმერ ქალთა ასოციაციის თავმჯდომარემ, ირინე ფხოველიშვილმა და სამხარეო ადმინისტრაციის ადგილობრივ თვითმმართველობის ორგანოებთან ურთიერთობის სამსახურის უფროსმა, ლევან ჟვანიამ მიმართეს და რეგიონში, ქალთა ეკონომიკური გაძლიერების პროცესში სახელმწიფო და არასამთავრობო სექტორის ერთობლივი ჩართულობის მნიშვნელობაზე გაამახვილეს ყურადღება.