რუსთავში, კომპანია „აჭარა ტექსტილის“ ახალი სამკერვალო საწარმო გაიხსნა - ღონისძიებას საქართველოს პრემიერ-მინისტრი, გიორგი გახარია,
ეკონომიკისა და მდგრადი განვითარების მინისტრი, ნათია თურნავა, ქვემო ქართლში სახელმწიფო რწმუნებული, შოთა რეხვიაშვილი, ცენტრალური და ადგილობრივი ხელისუფლებისა და კერძო სექტორის წარმომადგენლები დაესწრნენ.

საწარმო თურქული ინვესტიციით შეიქმნა და რუსთავსა და გარდაბანში 4 ათას ადამიანს დაასაქმებს. აღსანიშნავია, რომ საწარმოში დასაქმებულთა შორის 90% ქალია.

კომპანია „ქართლი ტექსტილს“ სამკერვალო საწარმოს ასაშენებლად სახელმწიფომ მიწა მასზე განთავსებული შენობა-ნაგებობით სიმბოლურ ფასად - 1 ლარად გადასცა. საწარმო სახელმწიფო „აწარმოე საქართველოში“ ბენეფიციარია - ადგილზე, მშენებლობაში 20 მლნ ლარის ინვესტიცია განხორციელდა, საიდანაც, 10 მლნ ლარი პროგრამის ფარგლებში აღებული სესხია.

„აჭარა ტექსტილი“ წლების მანძილზე თანამშრომლობს ცნობილ მსოფლიო ბრენდებთან, მათ შორის ისეთებთან, როგორიცაა Nike, ADIDAS, Lotto, Erima, New Balance და Under Armour. კომპანია 100%-ით ექსპორტზეა ორიენტირებული და წლიურად 15 000 000-ზე მეტი ერთეული პროდუქციის წარმოებას და ექსპორტს ახორციელებს.