ქვემო ქართლში სახელმწიფო რწმუნებულმა გიორგი დოხტურიშვილმა, სამხარეო ადმინისტრაციაში, მოქალაქეების მორიგი მიღება გამართა. 

გიორგი დოხტურიშვილმა, მოსახლეობის საჭიროებები პირადად მოისმინა და დასახელებული პრობლემების გადაჭრის გზებზე, მოადგილეებთან და ადმინისტრაციის სამსახურების ხელმძღვანელ პირებთან ერთად იმსჯელა.

შეხვედრის მიმდინარეობისას, მოქალაქეებმა ძირითადად ინფრასტრუქტურული, სოციალური და პირველადი ჯანდაცვის მიმართულებით არსებული საჭიროებების მოგვარების საკითხებზე ისაუბრეს. 

აღნიშნულ ფორმატშივე, სოფელ კრწანისის მცხოვრებლებმა მთის ძირის დასახლების წყალმომარაგებითა და მუნიციპალური ტრანსპორტით უზრუნველყოფასა და ადგილზე რეკრეაციული სივრცეები მოწყობის საჭიროებაზე გაამახვილეს ყურადღება - სახელმწიფო რწმუნებული მოსახლეობას დახმარებას დაპირდა და აღნიშნა, რომ ვითარების დეტალურად შესწავლის მიზნით, უახლოეს დღეებში ადგილზე პირადად ჩავა.  

დღესვე, მხარის ხელმძღვანელ პირს მარტყოფის პირველი საჯარო სკოლის მოსწავლეებმა ათასწლეულის გამოწვევის ფონდის მიერ გამოცხადებული კონკურსის ფარგლებში შექმნილი უპრეცენდენტო პროექტი გააცნეს, რომელსაც, ამ ეტაპამდე, მსოფლიოში ანალოგი არ აქვს - ჯგუფის წევრებმა, პანდემიით შექმნილ გლობალურ გამოწვევასთან ბრძოლის მიზნით, სპეციალური დამცავი ფარი და შესაბამისი მობილური აპლიკაცია შეიმუშავეს, რომელიც სოციალური დისტანციის დაცვას და ტემპერატურის კონტროლს ავტომატურ რეჟიმში უზრუნველყოფს. 

გიორგი დოხტურიშვილი ახალგაზრდა ინოვატორებს, საქმიანობის მომდევნო ეტაპზე განსახორციელებელ გეგმებში დახმარებას დაპირდა.

აღსანიშნავია, რომ ქვემო ქართლში სახელმწიფო რწმუნებულის ინიციატივით, ყოველი კვირის ოთხშაბათი, სამხარეო ადმინისტრაციასა და ადგილობრივ  თვითმმართველობებში, მოქალაქეთა მიღების დღედ დაწესდა. მსგავსი ფორმატის შეხვედრები ხორციელდება რეგიონის მუნიციპალიტეტებშიც - მერები მოსახლეობის საჭიროებებს ადგილზე, პირადად ეცნობიან.