თეთრიწყაროს მუნიციპალიტეტის ახლადარჩეული მერი უფლებამოსილების განხორციელებას შეუდგა.

გიორგი წიკლაური, მუნიციპალიტეტის თანამშრომლებს, ოფიციალურად, ქვემო ქართლში სახელმწიფო რწმუნებულმა წარუდგინა.

შოთა რეხვიაშვილმა სიტყვით გამოსვლისას მუნიციპალიტეტის მასშტაბით, ცენტრალური და ადგილობრივი ბიუჯეტის ერთობლივი დაფინანსებით მიმდინარე და დასრულებულ პროექტებზე გაამახვილა ყურადღება და აღნიშნა, რომ გიორგი წიკლაურის საქმიანობის პერიოდში, სახელმწიფო უწყებების აქტიური მხარდაჭერით მუნიციპალიტეტში კიდევ არაერთი მნიშვნელოვანი პროექტი განხორციელდება.

რეგიონის პირველმა პირმა, მუნიციპალიტეტის განვითარების პროცესში შეტანილი მნიშვნელოვანი წვლილისთვის მადლობა გადაუხადა გიორგი ქორიძეს და საკრებულოს ძველ შემადგენლობას, ახალ გუნდს კი განსაკუთრებული წარმატებები უსურვა.