ბოლნისის მუნიციპალიტეტში საქართველოს პარლამენტის რეგიონული პოლიტიკისა და თვითმმართველობის კომიტეტის გასვლითი სხდომა გაიმართა, სადაც საკანონმდებლო, აღმასრულებელი და ადგილობრივი ხელისუფლების წარმომადგენლებმა ქვემო ქართლის რეგიონის პოტენციალის, განვითრების ეტაპებისა და არსებული გამოწვევების შესახებ ერთობლივად იმსჯელეს.

კომიტეტის თავმჯდომარის სოზარ სუბარის ხელმძღვანელობით მიმდინარე სხდომას, საქართველოს რეგიონული განვითარებისა და ინფრასტრუქტურის მინისტრის მოადგილეები ილია ბეგიაშვილი და მზია გიორგობიანი, მუნიციპალური განვითარების ფონდის დირექტორი გიორგი შენგელია, ქვემო ქართლში სახელმწიფო რწმუნებული შოთა რეხვიაშვილი, პარლამენტში რეგიონის მაჟორიტარი დეპუტატები, ნინო ლაცაბიძე, გოგი მეშველიანი და ზაურ დარგალი, კომიტეტის წევრები, მუნიციპალიტეტების მერები და საკრებულოს თავმჯდომარეები დაესწრნენ.

სამუშაო შეხვედრის ფარგლებში, საუბარი შეეხო საქართველოს ორგანული კანონის - „ადგილობრივი თვითმმართველობის კოდექსის“ და „მაღალმთიანი რეგიონების განვითარების შესახებ“ კანონის შესრულების მიმდინარეობასა და იმპლემენტაციის საკითხებს. მუნიციპალიტეტების ხელმძღვანელმა პირებმა ყურადღება გაამახვილეს პროცესში შესაძლო ხარვეზებზე და მათი აღმოფხვრის საჭიროებებზე.

რეგიონული განვითარებისა და ინფრასტრუქტურის მინისტრის მოადგილემ და მუნიციპალური განვითრების ფონდის ხელმძღვანელმა, ქვემო ქართლში 2020 წელს გაწეული სამუშაოების და მუნიციპალიტეტებში დაგეგმილი ინფრასტრუქტურული პროექტების მიმდინარეობა, მათ შორის სახელმწიფო და ადგილობრივი მნიშვნელობის საავტომობილო გზების მშენებლობა-რეაბილიტაციის, წყალმომარაგება-წყალარინებისა და მაღალმთიანი რეგიონების ფონდის დაფინასებით უზრუნველყოფილი პროექტები განიხილეს.

ქვემო ქართლის რეგიონის სოციალურ-ეკონომიკურ თავისებურებებზე, საბაზისო და მასშტაბური პროექტების განხორციელების მიმართულებით უკვე არსებულ შედეგებზე, დაგეგმილ სამუშაოებზე და მხარეში არსებულ საჭიროებებზე გაამახვილა ყურადღება ქვემო ქართლში სახელმწიფო რწმუნებულმა, შოთა რეხვიაშვილმა. საქართველოს პარლამენტში ქვემო ქართლის მაჟორიტარმა დეპუტატებმა კი, მხარის კიდევ უფრო მეტი განვითარების შესახებ, საკუთარი ინიციატივები წარმოადგინეს.

აღსანიშნავია, რომ საქართველოს პარლამენტის რეგიონული პოლიტიკისა და თვითმმართველობის კომიტეტი, გასვლით სხდომებს, ქვეყნის მასშტაბით, ეტაპობრივად გამართავს.