ქვემო ქართლში სახელმწიფო რწმუნებული, შოთა რეხვიაშვილი, ბოლნისის მუნიციპალიტეტში, საქართველოს პარლამენტის აგრარულ საკითხთა კომიტეტის გასვლით სხდომას დაესწრო, სადაც რეგიონის პოტენციალზე, სამრეწველო ტრადიციებზე, ეკონომიკურ შესაძლებლობებზე და სოფლის მეურნეობის განვითარების მიმართულებით განხორციელებულ პროექტებზე ისაუბრა.

სხდომას კომიტეტის თავმჯდომარე, ნინო წილოსანი, გარემოს დაცვისა და სოფლის მეურნეობის მინისტრი, ლევან დავითაშვილი, პარლამენტში ბოლნისის, წალკის, თეთრიწყაროსა და დმანისის მაჟორიტარი დეპუტატი, გოგი მეშველიანი, ადგილობრივი თვითმმართველობის ხელმძღვანელი პირები, ღვინის ეროვნული სააგენტოს თავმჯდომარე და თემით დაინტერესებული მეწარმეები დაესწრნენ.

გასვლითი შეხვედრის ფორმატში, ხელისუფლების წარმომადგენლებმა, ღვინის ეროვნული სააგენტოს მიერ 2020 წლის საქმიანობის ანგარიში მოისმინეს. დღის განმავლობაში კი საკანონმდებლო და აღმასრულებელი ხელისუფლების წარმომადგენლებმა, ბოლნისის მუნიციპალიტეტში, ეკომიგრანტი ქალების მიერ შექმნილი, ქალთა კოოპერატივი “დისველის” რძის გადამამუშავებელი საწარმო მოინახულეს. ასევე გაეცნენ ელიას მთის სამონასტრო კომპლექსში ტერასული ტიპის მევენახეობას, რომელიც 3 ჰექტარ ფართობზეა გაშენებული და ადგილზე, ყოველწლიურად, 20 000 ლიტრი წითელი და თეთრი ღვინო იწარმოება.