ქვემო ქართლში სახელმწიფო რწმუნებული, შოთა რეხვიაშვილი, რუსთავში ყაზახეთის რესპუბლიკის საპატიო საკონსულო დაწესებულების გახსნის ოფიციალურ ცერემონიალს დაესწრო - ღონისძიებაზე, ყაზახეთის რესპუბლიკის საგანგებო და სრულუფლებიანი ელჩი საქართველოში, ბაურჟან მუხამეჯანოვი, საქართველოს საგარეო საქმეთა მინისტრის მოადგილე ალექსანდრე ხვთისიაშვილი, რუსთავის მერი ირაკლი ტაბაღუა, ყაზახეთის რესპუბლიკის საპატიო კონსული საქართველოში, გიორგი ჯახუტაშვილი და სხვა მიწვეული სტუმრები იმყოფებოდნენ.

დაწესებულება ორ საკონსულო ოლქს, ქვემო ქართლსა და მცხეთა-მთიანეთს მოიცავს, საქმიანობის მიზნებს შორის კი საქართველოსა და ყაზახეთს შორის სავაჭრო, ეკონომიკური, კულტურული და სამეცნიერო ურთიერთობების გაღრმავების ხელშეწყობა და საქართველოში ყაზახეთის მოქალაქეთა ინტერესების დაცვაა.

აღსანიშნავია, რომ საქართველოსა და ყაზახეთის რესპუბლიკას შორის, დიპლომატიური ურთიერთობები 1992 წლიდან დამყარდა - ყაზახეთი საქართველოს ერთ-ერთი უმსხვილესი სავაჭრო პარტნიორია, განსაკუთრებით აღსანიშნავი კი ენერგეტიკისა და სატრანსპორტო სფეროებში თანამშრომლობაა.

ღონისძიება კოვიდ 19-ის პანდემიის გამო არსებული რეგულაციების დაცვით ჩატარდა.