საქართველოს მთავრობამ ქალაქ რუსთავში ჰაერის ხარისხის გაუმჯობესების 2020- 2022 წლების სამოქმედო გეგმა დაამტკიცა.

შემცირდება საწარმოებიდან მავნე ნივთიერებების გაფრქვევები - გეგმის მიხედვით შემუშავდება თანამედროვე ევროპული საკანონმდებლო ბაზა, განხორციელდება უფრო აქტიური ზედამხედველობა და დაწესდება ავტომატური მონიტორინგი, გაიზრდება ჯარიმები და გამკაცრდება სანქციები.

ქალაქში ეტაპობრივად გაიზრდება გამწვანებული სივრცეები, გაუმჯობესდება საგზაო ინფრასტრუქტურა და საზოგადოებრივი ტრანსპორტი, გაფართოვდება ჰაერის ხარისხის მონიტორინგი.

გეგმა გარემოს დაცვისა და სოფლის მეურნეობის სამინისტრომ, რუსთავის მსხვილ საწარმოებში გასულ წელს ჩატარებული სრული ინსპექტირების შემდეგ, პარლამენტის, სამოქალაქო სექტორისა და ბიზნესის ჩართულობით შეიმუშავა, მის განხორციელებაზე კი 62 მლნ ლარზე მეტი დაიხარჯება.