სოფელ ყარაჯალარის მოსახლეობამ საკარანტინო შეზღუდვების მოხსნის მოთხოვნით აქცია გამართა. ადგილზე ქვემო ქართლში სახელმწიფო რწმუნებული შოთა რეხვიაშვილი და გარდაბნის მუნიციპალიტეტის ხელმძღვანელი პირები იმყოფებოდნენ.

ადგილობრივები სოფელში საკარანტინე წესების გაუქმებას და სასოფლო-სამეურნეო პროდუქტის საკუთარი ძალებით რეალიზებას ითხოვდნენ.

შესაბამის უწყებებთან შეთანხმების საფუძველზე გადაწყდა, რომ მოსახლეობა მოსავალს ბაზარზე სარეალიზაციოდ, წესების სრული დაცვით, თავად გაიტანენ. სოციალურად დაუცველი ოჯახებისთვის კი სოფელში საკვები პროდუქტები დარიგდება.

,,სოფლიდან პროდუქტების გატანას დისტრიბუტორები, ამ დრომდეც ორგანიზებულად ახდენენ, თუმცა ფასთა სხვადასხვაობიდან გამომდინარე, მოსახლეობას საკუთარი მოსავლის რეალიზება თავად სურს. ჩვენ მათ მივეცით პირობა, რომ ადგილობრივები 10 სატვირთო ავტომანქანით სოფლიდან პროდუქტს თავად გაიტანენ. მათ ჩაუტარდებათ სწრაფი ტესტი, საპატრულო პოლიცია კი ნავთლუღის ბაზარში გააცილებს და მათი სურვილისამებრ, პროდუქციის რეალიზება ე.წ. პირველი ხელიდან მოხდება. გარდა ამისა, დაწყებულია და გრძელდება სოციალურად დაუცველი მოსახლეობის სურსათით უზრუნველყოფა. ამ სოფელში სულ 85 მოწყვლადი კატეგორიის ოჯახი ცხოვრობს და პირველ რიგში, მათი დახმარება მოხდება. რაც შეეხება საკარანტინე წესების მოხსნას, საინკუბაციო ვადა არის ორი კვირა, რომელმაც უნდა მოგვცეს სურათი, როგორ დავაჩქაროთ პროცესები”-განაცხადა ქვემო ქართლში სახელმწიფო რწმუნებულმა შოთა რეხვიაშვილმა.

აღსანიშნავია, რომ გარდაბნის მუნიციპალიტეტის სოფელ ყარაჯალარში მაღალი ეპიდემიოლოგიური რისკის გამო, საკარანტინო შეზღუდვები 24 ივლისს ამოქმედდა.