სახელმწიფო რწმუნებულის ადმინისტრაციაში, „ქვემო ქართლის ნარჩენების მართვის“ პროექტის ფარგლებში, ახალი, ევროპული სტანდარტების შესაბამისი რეგიონული არასახიფათო ნარჩენების განთავსების ობიქეტის მშენებლობის შესახებ, საინფორმაციო შეხვედრა გაიმართა, რომელსაც ქვემო ქართლში სახელმწიფო რწმუნებული, შოთა რეხვიაშვილი, საქართველოს მყარი ნარჩენების მართვის კომპანიის დირექტორი, გიორგი შუხოშვილი და თეთრიწყაროს მუნიციპალიტეტის მერი, გიორგი ქორიძე ესწრებოდნენ.

შეხვედრის მონაწილეებმა, ახალი რეგიონული ობიექტის მნიშვნელობის შესახებ, სოფელ შავსაყდრისა და წინწყაროს მოსახლეობას, ასევე არასამთავრობო ორგანიზაციების წარმომადგენლებს, პრეზენტაცია წარუდგინეს.

პროექტის ფარგლებში, რეგიონის 5 მუნიციპალიტეტისთვის (თეთრიწყარო, მარნეული, წალკა, ბოლნისი და დმანისი) დაგეგმილია ახალი, რეგიონული, ევროსტანდარტების შესაბამისი არასახიფათო ნარჩენების განთავსების ობიექტის მოწყობა.

ახალი ობიექტი 200 ათასზე მეტ მოსახლეს მოემსახურება. პროექტი ასევე ითვალისწინებს მუნიციპალიტეტების ნარჩენების შესაგროვებელი ტექნიკური საშუალებებით აღჭურვას, რაც უფრო ეფექტურს გახდის დასუფთავების სისტემას და რეგიონში გააუმჯობესებს სანიტარულ პირობებს.

ნარჩენების განთავსების ახალი ობიექტის მოწყობის პარალელურად ადგილობრივი მოსახლეობისთვის დამატებითი სამუშაო ადგილები გაჩნდება.

რეგიონში ეტაპობრივად დაიხურება არსებული ნაგავსაყრელები, რაც მოსახლეობის გარემო და საცხოვრებელ პირობებს საგრძნობლად გააუმჯობესებს.

პროექტი ევროპის რეკონსტრუქციისა და განვითარების ბანკის (EBRD) და შვედეთის საერთაშორისო განვითარების თანამშრომლობის სააგენტოს (SIDA) ფინანსური მხარდაჭერით ხორციელდება.