საქართველოს პრემიერ-მინისტრი, გიორგი გახარია და ეკონომიკისა და მდგრადი განვითარების მინისტრი, ნათია თურნავა რუსთავში კომპანია „აჭარა ტექსტილის“ შვილობილი სამკერვალო საწარმოს - „ქართლი ტექსტილის“ პრეზენტაციაზე იმყოფებოდნენ.

ღონისძიებას ქვემო ქართლში სახელმწიფო რწმუნებული, შოთა რეხვიაშვილი, ქალაქის მერი, ირაკლი ტაბაღუა და ცენტრალური და ადაგილობრივი ხელისუფლების ხელმძღვანელი პირები დაესწრნენ.

„ქართლი ტექსტილს “ქალაქ რუსთავში გაგარინის ქუჩის მიმდებარე ტერიტორიაზე მიწის ფართობი სახელმწიფომ გადასცა. ინვესტიციის საერთო მოცულობა 20 მილიონი ლარია, საიდანაც ნახევარი (10 მლნ) ეკონომიკის სამინისტროს - „აწარმოე საქართველოში“ პროგრამის ფარგლებში მიღებული სესხია. პირველ ეტაპზე საწარმოში 1000 ადამიანი დასაქმდება, ხოლო მეორე ეტაპზე მათი რაოდენობა 3000-მდე გაიზრდება.

როგორც პრემიერ - მინისტრმა სიტყვით გამოსვლისას აღნიშნა დღეს, მთავრობის უპირველესი პრიორიტეტია ეკონომიკაზე, ბიზნესზე კრიზისის ზემოქმედების მინიმიზაცია და რაც მთავარია, კრიზისის პირობებშიც, ახალი სამუშაო ადგილების შექმნა. გიორგი გახარიას თქმით, კრიტიკულად მნიშვნელოვანია, რომ ზუსტად 4 თვეში შეიქმნება 3 000 სამუშაო ადგილი, რაც რეგიონისთვის და ქალაქისთვის სერიოზული მიღწევაა.

ნათია თურნავას თქმით, ეს არის შესანიშნავი პროექტი და მნიშვნელოვანი ინვესტიცია, რომელიც საქართველოს საექსპორტო პოტენციალის გაძლიერებაში თავის წვლილს შეიტანს, შესაბამისად, სახელმწიფო, მთავრობა აქტიურად უდგას გვერდში მსგავს პროექტებს.

,,ეს არის დამოუკიდებელი საქართველოს ისტორიაში ქვემო ქართლში ერთი ბიზნესიდან შექმნილი სამუშაო ადგილების რეკორდული რაოდენობა“ - განაცხადა ქვემო ქართლში სახელმწიფო რწმუნებულმა შოთა რეხვიაშვილმა.

მისივე განმარტებით, სამხარეო ადმინისტრაციისა და ადგილობრივი თვითმმართველობის ხელმძღვანელი პირები, მუდმივ კომუნიკაციაში არიან ბიზნეს-პარტნიორთან და უმოკლეს ვადებში იქნება გადაწყვეტილი ყველა ის საჭიროება, რაც პროექტის განხორცილებისას დადგება დღის წესრიგში.

საწარმო - „ქართლი ტექსტილი“ „აჭარა ტექსტილს“ ეკუთვნის, რომელსაც ბათუმში, ფოთსა და ქობულეთში სამი სამკერვალო ფაბრიკა აქვს. „აჭარა ტექსტილი“ წლიურად 15 მლნ-ზე მეტი ერთეული პროდუქციის წარმოებასა და ექსპორტს ახორციელებს. ის თანამშრომლობს ისეთ წამყვან საერთაშორისო კომპანიებთან როგორებიცაა: Nike, ADIDAS, Puma და ა.შ. დასაქმებულია 3500 ადამიანი.