ქვემო ქართლში სახელმწიფო რწმუნებული შოთა რეხვიაშვილი და გერმანიის ფედერაციის საგანგებო და სრულუფლებიანი ელჩი, ჰუბერტ ქნირში, ადგილობრივი ხელისუფლების წარმომადგენლებთან და გერმანიის საერთაშორისო თანამშრომლობის საზოგადოების GIZ-ის პროგრამის ხელმძღვანელთან ერთად, ზურაბ ჟვანიას სახელობის სახელმწიფო ადმინისტრირების სკოლის მარნეულის რეგიონულ სასწავლო ცენტრს ესტუმრნენ.
მხარეებმა სკოლაში მოქმედი პროგრამების, სახელმწიფო ენის ცოდნის აუცილებლობისა და დისტანციური სწავლების პროცესის შესახებ ისაუბრეს.

შოთა რეხვიაშვილმა, ადმინისტრირების სკოლის ხელმძღვანელსა და უცხოელ პარტნიორებს ნაყოფიერი თანამშომლობისა და აქტიური მხარდაჭერისთვის მადლობა გადაუხადა და სასწავლო ცენტრის მიერ გაწეულ საქმიანობაზე და იმ პროგრამების მნიშვნელობაზე ისაუბრა, რომელიც ეთნიკური უმცირესობების წარმომადგენლებს სახელმწიფო ენის სწავლებასა და ინტეგრაციაში ეხმარება.

,,ზურაბ ჟვანიას სახელობის სახელმწიფო ადმინისტრირების სკოლა მარნეულის მუნიციპალიტეტში, თავისი მნიშვნელობიდან გამომდინარე, ძალიან ბევ სასიკეთო საქმეს აკეთებს, როგორც სკოლამდელი აღზრდისა და სასკოლო ასაკის, ასევე საჯარო მოხელეების გადამზადების მიმართულებით, სადაც ადამიანებს შესაძლებლობა და ყველა პირობა აქვთ საფუძვლიანად შეისწავლონ სახელმწიფო ენა და აიმაღლონ პროფესიული კვალიფიკაცია“ - განაცხადა შოთა მხარეში სახელმწიფო რწმუნებულმა, შოთა რეხვიაშვილმა.

შეხვედრის მიმდინარეობისას ყურადღება გამახვილდა სასწავლო ცენტრის გერმანულ მხარესთან საერთაშორისო პარტნიორობაზე და სამომავლო თანამშრომლობის პერსპექტივებზე.