28 ნოემბერს, ქვემო ქართლში სახელმწიფო რწმუნებულმა, შოთა რეხვიაშვილმა და რუსთავის მერმა, ირაკლი ტაბაღუამ, სახელმწიფო რწმუნებულის ადმინისტრაციაში, რუსთაველ კალიგრაფს, 19 წლის ნიკოლოზ ღუნაშვილს უმასპინძლეს, რომელმაც სტრასბურგში ტრამვაიზე დატანილი ანბანი შექმნა.

მხარისა და ადგილობრივი ხელისუფლების წარმომადგენლებმა ახალგაზრდა კალიგრაფს მიღწეული წარმატება მიულოცეს, სიმბოლური საჩუქრები გადასცეს და მომავალი თანამშრომლობის გეგმებზე შეთანხმდნენ. ნიკოლოზ ღუნაშვილი რუსთავის მუნიციპალიტეტში, საჯარო სამსახურში სტაჟირების გავლას შეძლებს და სამომავლოდ ადგილზე საქმიანობას მისი სურვილისამებრ შეუდგება.

ნიკოლოზ ღუნაშვილი კალიგრაფიით ბავშვობის ასაკიდან დაინტერესდა და აღნიშნილი მიმართულებით ცოდნის გაღრმავება რუსთაველი პედაგოგების დახმარებით შეძლო, არაერთხელ იყო ქვემო ქართლის მასშტაბით გამართული ,,კალიგრაფიის მარგალიტები“-ს პირველადგილოსანი. ქართული ანბანის ახალი და განსხვავებული მოხაზულობების გარდა, ნიკოლოზი კალიგრამებსაც ქმნის და უკვე ძალიან ბევრი საინტერესო პროექტის მონაწილეა. ამჟამად იგი საქართველოს ტექნიკური უნივერსიტეტის, სამშენებლო ფაკულტეტის, მეორე კურსის სტუდენტია.

აღსანიშნავია, რომ სტრასბურგში, ქართული ანბანით გაფორმებული ტრამვაი, 6 თვის განმავლობაში, იმოძრავებს. ეს მოვლენა საქართველოსთვის ევროპის საბჭოს თავმჯდომარეობის გადაბარებას ეძღვნება.