ქვემო ქართლის რეგიონში, ღია დიალოგის ფარგლებში, მოსახლეობასთან შეხვედრები აქტიურ რეჟიმში მიმდინარეობს. ხელისუფლების წარმომადგენლები ამჯერად ბოლნისის მუნიციპალიტეტის სოფელ ხატავეთში, ვანათში, სამტრედოსა და რაჭისუბანში იმყოფებოდნენ.

შეხვედრას ქვემო ქართლში სახელმწიფო რწმუნებული შოთა რეხვიაშვილი, საქართველოს პარლამენტში ბოლნისის მაჟორიტარი დეპუტატი, გოგი მეშველიანი და მუნიციპალიტეტის მერის მოადგილე, ბუბა გობეჯიშვილი ესწრებოდნენ.

ცენტრალური და ადგილობრივი ხელისუფლების წარმომადგენლებმა სოფლის მცხოვრებლებთან ერთად, ადგილზე არსებულ საჭიროებებზე ისაუბრეს. განისაზღვრა კონკრეტული პროექტები, რომელიც სოფლებში 2020 წლის განმავლობაში განხორციელდება.

2019 წელს, ბოლნისის მუნიციპალიტეტში ხორციელდება 8 400 000 ლარის ღირებულების 35 ინფრასტრუქტურული პროექტი, მათ შორის - 16 საქართველოს რეგიონული განვითარების პროექტების ფონდის, ხოლო 19 ადგილობრივი ბიუჯეტის დაფინანსებით.