გარდაბნის მუნიციპალიტეტის სოფელ თელეთში ცენტრალური და ადგილობრივი ხელისუფლების წარმომადგენლებმა საბავშვო ბაღი გახსნეს.

სააღმზრდელო დაწესებულების მშენებლობა ადგილობრივი ბიუჯეტიდან 721 000 ლარით დაფინანსდა და პროექტის ფარგლებში 2 ჯგუფზე და 60 ბავშვზე გათვლილი თანამედროვე სტანდარტების შესაბამისი ინფრასტრუქტურა მოეწყო.

ღონისძიებას რეგიონული განვითარებისა და ინფრასტრუქტურის მინისტრის პირველი მოადგილე, ილია ბეგიაშვილი, ქვემო ქართლში სახელმწიფო რწმუნებული შოთა რეხვიაშვილი, საქართველოს პარლამენტში რუსთავისა და გარდაბნის მაჟორიტარი დეპუტატი ნინო ლაცაბიძე და მუნიციპალიტეტის მერი რამაზ ბუდაღაშვილი დაესწრნენ.

აღსანიშნავია, რომ მუნიციპალიტეტის მასშტაბით, ბოლო რამდენიმე წლის განმავლობაში ათი სააღმზრდელო დაწესებულება აშენდა. არსებული საბავშვო ბაღები კი რეაბილიტირდა და ადგილზე სრულად განახლდა მატერიალურ-ტექნიკური ბაზა.

ამ დროისთვის, გარდაბნის მუნიციპალიტეტის ბალანსზე არსებულ 33 საბავშვო ბაღში, ბავშვები სკოლამდელ განათლებას, თანამედროვე სტანდარტების შესაბამის გარემოში იღებენ.