ქვემო ქართლში სახელმწიფო რწმუნებულმა, შოთა რეხვიაშვილმა, სამხარეო ადმინისტრაციისა და მუნიციპალიტეტის ხელმძღვანელ პირებთან ერთად, რუსთავში ინფრასტრუქტურის სამინისტროს რეგიონული განვითარების ფონდისა და ადგილობრივი ბიუჯეტის თანადაფინანსებით მიმდინარე პროექტების მონიტორინგი განახორციელა. 

ქალაქის მასშტაბით, ამ ეტაპზე, აქტიურად მიმდინარეობს ძველი, ისტორიული უბნების და რეკრეაცრიული სივრცეების მოწყობა-რეაბილიტაცია.  
 2 მლნ 400 000 ლარის ღირებულების პროექტის ფარგლებში რუსთაველის ქუჩაზე  საცხოვრებელი შენობების მიმდებარე ტერიტორია, ტროტუარები,  ბეტონის ბორდიურები, გაზონები და სარწყავი სისტემა მოეწყობა, ადგილზე განთავსდება ლითონის დეკორატიული ღობე, განახლდება გარე განათების ქსელი.

უახლოეს მომავალში ქალაქს კიდევ ორი ახალი რეკრეაციული სივრცე შეემატება -  ახალგაზრდობის პარკში და რუსთავის თეატრის მიმდებარედ არსებულ სკვერში, სამუშაოები აქტიურ ფაზაშია შესული. ორივე პროექტი მიმდინარე წლის ზაფხულისთვის უნდა დასრულდეს და მათი ჯამური ღირებულება 3 მლნ 328 011 ლარია. 

2021 წლის ბოლომდე, რუსთავის მერია ქალაქში 52 ინფრასტრუქტურული პროექტის განხორციელებას გეგმავს და მათი საერთო ღირებულება დაახლოებით 15 მილიონი ლარია.