ვიცეპრემიერმა, იუსტიციის მინისტრმა, თეა წულუკიანმა და ქვემო ქართლში სახელმწიფო რწმუნებულმა, შოთა რეხვიაშვილმა, მუნიციპალიტეტის ხელმძღვანელ პირებთან ერთად, გარდაბანში იუსტიციის სახლის მშენებლობის პროცესი დაათვალიერეს.

ადგილზე სამუშაოები დასკვნით ფაზაშია და მომხმარებელი 450-ზე მეტი სერვისით სარგებლობას მიმდინარე წლის შემოდგომიდან შეძლებს.

გარდაბნის იუსტიციის სახლის მშენებლობა არქიტექტორ ლევან კაკაურიძის პროექტით ხორციელდება. შენობის ფართი 1000-მდე კვადრატული მეტრია. გარდაბნის იუსტიციის სახლი ერთ-ერთია იმ სამი ფილიალიდან, რომლებიც 2020 წლის შემოდგომაზე გაიხსნება. ადგილზე ქორწინების მსურველი წყვილებისთვის ქორწინების სახლიც განთავსდება. ფილიალში დასაქმდება 17 ადამიანი.

აღსანიშნავია, რომ გარდაბნის ფილიალი მეოთხე იუსტიციის სახლი იქნება, რომელიც ქვემო ქართლის რეგიონში გაიხსნება. ქალაქებში - რუსთავში, მარნეულში და ბოლნისში, უკვე ფუნქციონირებს იუსტიციის სახლის ფილიალები. მუნიციპალიტეტების ადმინისტრაციულ ცენტრებსა და სოფლებში კი მოქალაქეებისთვის საჭირო მომსახურებების მიღებას 10 საზოგადოებრივი ცენრტი უზრუნველყოფს.